Fyrr í dag var sagt frá því að Njarðvík hefði sent formlega kvörtun til KSÍ vegna ummæla þjálfara Magna í Inkasso-deildinni um helgina. Njarðvík vann fallbaráttuslag liðanna 2-1.
„Hann vænir Ivan Prskalo leikmann Njarðvíkur um að vera svikara og svindlara," segir í yfirlýsingu Njarðvíkinga varðandi viðtal við Svein Þór Steingrímsson sem birtist hér á Fótbolta.net. Þeir sögðu Svein hafa ráðist á leikmann Njarðvíkur og dómara leiksins með mjög ódrengilegum hætti.
Þá kvartaði Njarðvík yfir framkomu Gauta Gautasonar, leikmanns Magna og sagði að málin yrðu sett í réttan farveg innan KSÍ.
Magnamenn sendu í kvöld frá sér afsökunarbeiðni vegna málsins.
Afsökunarbeiðni Magna
Stjórn Magna Grenivíkur og Sveinn Þór Steingrímsson þjálfari mfl.ka vilja biðjast afsökunar á orðavali Sveins í viðtali eftir leik Njarðvíkur og Magna síðastliðin laugardag.
Ekki var ætlunin að særa einn né neinn með ummælum sem sögð voru í viðtalinu en því miður kemur fyrir að orð eru sögð í hita leiksins sem betur væru ósögð.
Stjórn Íþróttafélagsins Magna og Sveinn Þór Steingrímsson þjálfari.
Athugasemdir
