Þá er líka áhugavert að skoða xGA tölfræðina (expected goals against) sem snýr að mörkum fengnum á sig og xPTS tölfræðina (expected points) sem skoðar mögulegan stigafjölda eftir að fyrrnefndar breytur eru teknar með í dæmið. Hægt er að reikna xPTS á mismunandi vegu.

Þetta er tölfræði sem segir til um hvar lið ættu raunverulega að vera á stöðutöflunni ef fótbolti væri spilaður á stærðfræðiblaði. Þannig er hægt að reikna út hversu 'heppin' eða 'óheppin' liðin hafa verið á tímabilinu, eða einfaldlega hversu góð eða léleg þau hafa verið í að nýta færin sín og koma í veg fyrir mörk.

Aston Villa, sem situr í þriðja sæti úrvalsdeildarinnar, er 'heppnasta' lið fyrri hluta tímabilsins. Lærlingar Unai Emery eru með 39 stig eftir 19 umferðir og markatöluna +7, en samkvæmt xG og xPTS töflunum ætti liðið að vera í fallbaráttu.

Samkvæmt einhverjum útreikningum ætti Aston Villa raunverulega að vera með svo lítið sem 22 stig, en samkvæmt öðrum útreikningum eru stigin aðeins 18. Það er 17-21 stigi minna heldur en liðið er með í raunveruleikanum.

Á hinum enda stöðutöflunnar hefur Wolves verið langóheppnasta lið tímabilsins. Botnliðið hefur verið að bæta minnst eftirsóttu met enska boltans og er aðeins með 3 stig það sem af er tímabils, en samkvæmt xPTS töflunum ættu Úlfarnir að vera með eitthvað á bilinu frá 14 til 20 stig.

Önnur lið sem hafa verið óheppin og ættu að vera talsvert hærra en þau eru á stöðutöflunni eru Leeds United, Bournemouth og Newcastle United.

Önnur lið sem hafa verið heppin og ættu að vera talsvert lægra en þau eru á stöðutöflunni eru Sunderland, Everton og Fulham.