Spánn: Tíu Börsungar kláruðu Celta

Fullkomin byrjun Barcelona á spænska deildartímabilinu hélt áfram er liðið lagði Celta Vigo að velli í dag.

Ansu Fati kom Barca yfir snemma leiks og var fyrri hálfleikur ansi jafn. Clement Lenglet, varnarmaður Barca, fékk rautt spjald undir lok hálfleiksins þegar hann gaf andstæðingi olnbogaskot í kapphlaupi að boltanum.

Tíu leikmenn Barca tvöfölduðu forystuna í upphafi síðari hálfleiks. Lionel Messi prjónaði sig í gegnum vörnina og sendi boltann í Lucas Olaza, varnarmann Celta, og þaðan í netið.

Heimamenn blésu til sóknar en náðu ekki að minnka muninn. Sergi Roberto innsiglaði sigurinn með þriðja marki gestanna á 95. mínútu.