Gylfi nýtur þess að spila í nýrri stöðu

Gylfi skoraði úr vítaspyrnu í leiknum í gær en hann segist sáttur við að spila aftar á miðjunni en áður.

„Staða mín hefur verið aðeins öðruvísi síðan stjórinn kom, ég er aðeins varnarsinnaðari. Ég er orðinn vanur þessu núna, að sitja fyrir framan varnarlínuna. Þetta er gott og ég nýt þess," sagði Gylfi.

„Það var gott að ná að skora og ná nokkrum skotum sem ég hef ekki náð í síðustu leikjum. Það er langt síðan við fengum vítaspyrnu og það var ánægjulegt að skora og ná í þrjú stig. Heilt yfir var þetta góður dagur."

Everton mætir Tottenham á mánudag og í kjölfarið eru leikir gegn Southampton og Wolves. Everton er í 11. sæti en einungis tvö stig eru í 7. sætið sem gæti geifð Evrópusæti. Gylfi segir Everton hafa Evrópudrauma.

„Það væri frábært. Allir strákarnir vilja spila í Evrópu. Ferðast á útivelli og spila gegn mismunandi liðum. Það myndi gera næsta tímabil ennþá betra. Ég veit að það þýðir að við munum spila marga leiki en það væri gaman að komast í Evrópukeppni," sagði Gylfi.

„Við eigum þrjá leiki á næstu sjö dögum og þurfum allan hópinn. Við erum með marga góða leikmenn og góðan hóp.Það eru margir leikir framundan á næstu vikum og við þurfum að passa upp á að hvíla okkur, vera klárir í næsta leik og halda áfram."