Andy Goram, fyrrum landsliðsmarkvörður Skotlands og lykilmaður í liðum Hibernian og Rangers, er látinn eftir stutta baráttu við krabbamein.
Goram lést í dag, aðeins 58 ára gamall, en áhugamenn um enska boltann gætu kannast við markvörðinn frá árinu 2001 þegar Sir Alex Ferguson fékk hann á láni til Manchester United.
Goram spilaði tvo leiki fyrir Rauðu djöflana á lánssamningi frá Motherwell í Skotlandi þegar hann var 37 ára gamall og vann úrvalsdeildina með félaginu.
Goram var margt til listanna lagt og er hann eini maðurinn í sögu fótboltalandsliðs Skotlands til að spila einnig fyrir landsliðið í krikket.
Um aldamótin kusu stuðningsmenn Rangers Goram sem besta markvörð í sögu félagsins og starfaði hann sem markmannsþjálfari hjá skoskum félagsliðum allt þar til hann greindist með krabbamein í vélinda núna í maí.