Slot: Stuðningurinn gerir þetta félag sérstakt

Liverpool vann 2-0 gegn Aston Villa til að binda enda á fjögurra leikja taphrinu. Orðrómur var uppi um að starf Slot hjá Liverpool væri í hættu eftir svona marga tapleiki í röð, en þjálfarinn gefur lítið fyrir orðróma.

„Hljóðið í eigendunum hefur ekkert breyst frá því í fyrra, þeir eru að segja mér nákvæmlega sömu hluti og á síðustu leiktíð. Ég er í mestu sambandi við Richard Hughes og stundum heyri ég líka í hinum. Þeir sjá svipaða hluti og ég er að sjá," sagði Slot, sem þakkaði stuðningsmönnum sérstaklega fyrir.

Stuðningsmenn Liverpool sungu til Slot í sigrinum gegn Aston Villa, enda hefur þjálfarinn þurft að liggja undir gagnrýni í fjölmiðlum síðustu vikur.

„Stuðningurinn sem ég fékk í kvöld er það sem gerir þetta félag svona sérstakt. Það var magnað að heyra stuðningsmennina syngja nafn mitt, það hjálpaði mér mikið á erfiðum tíma.

„Gengi liðsins hefur ekki verið nægilega gott og síðustu vikur hafa verið erfiðar fyrir mig. Þessir söngvar yljuðu mér um hjartarætur."