Robert Lewandowski, besti leikmaður heims um þessar mundir, gerði sér lítið fyrir og skoraði fernu er FC Bayern rétt marði Hertha Berlin í uppbótartíma.

Bæjarar voru með yfirhöndina og skoraði Lewy fyrsta markið skömmu fyrir leikhlé. Hann tvöfaldaði forystuna í upphafi síðari hálfleiks en Jhon Cordoba og Matheus Cunha náðu að jafna fyrir gestina.

Lewy var aftur á ferðinni á 85. mínútu en skömmu síðar jafnaði Jessic Ngankam og virtist vera að bjarga stigi fyrir gestina.

Svo var ekki því Bayern fékk vítaspyrnu í uppbótartíma og skoraði Lewy af vítapunktinum.

Þetta var mikilvægur sigur eftir tap gegn Hoffenheim í síðustu umferð. Bayern er með sex stig og markatöluna 13-7 eftir þrjár umferðir. Hertha er með þrjú stig.