Pia Sundhage, þjálfari Sviss.
Þurfa að díla við hraðann hennar Sveindísar.
Goðsögnin Pia Sundhage er þjálfari Sviss sem mætir Íslandi í algjörum lykilleik á EM kvenna í dag. Sviss er á heimavelli á mótinu og væntingarnar eru miklar til liðsins.
Sundhage er orðin 65 ára gömul og hefur á glæstum þjálfaraferli meðal annars stýrt landsliðum Bandaríkjanna, Svíþjóðar og Brasilíu. Hún vann á sínum tíma tvö Ólympíugull sem þjálfari bandaríska landsliðsins.
Sundhage er orðin 65 ára gömul og hefur á glæstum þjálfaraferli meðal annars stýrt landsliðum Bandaríkjanna, Svíþjóðar og Brasilíu. Hún vann á sínum tíma tvö Ólympíugull sem þjálfari bandaríska landsliðsins.
Fréttamaður Fótbolta.net spurði Sundhage út í íslenska landsliðið á fréttamannafundi í gær og nefndi hún tvö lykilatriði fyrir svissneska liðið í baráttunni gegn því íslenska; að verjast föstum leikatriðum og skyndisóknum; og þá sérstaklega hraða Sveindísar Jane Jónsdóttur í hröðum upphlaupum.
„Þetta verður erfiður leikur á morgun. Þær eru líkamlega sterkar og með gott lið," sagði Sundhage við spurningu fréttamanns Fótbolta.net.
„Ég heyri sjálfa mig tala um föst leikatriði aftur og aftur. Þegar við spiluðum gegn þeim fyrir stuttu þá voru þær sterkar í skyndisóknunum með Sveindísi Jane. Hún hefur gríðarlegan hraða."
„Ef við getum varist föstum leikatriðum og gert það vel, þá verð ég ánægð. Allir vita nákvæmlega hvað þær verða að gera. Þetta verður bardagi og mér finnst liðið mjög tengt. Við erum tilbúnar í það," sagði sænska goðsögnin.
Leikurinn í kvöld hefst klukkan 19:00 og verður auðvitað í beinni textalýsingu á Fótbolta.net.
Athugasemdir
