„Hópurinn er mjög spenntur og ég finn það að við erum tilbúnir að mæta Svartfellingum og taka þrjú stig þar," segir Stefán Teitur.

„Ég held að það væri frábær byrjun fyrir okkur að stimpla okkur vel inn með þremur stigum og góðri frammistöðu, og sýna að við ætlum okkur hluti í þessum riðli."

Stefán Teitur gekk í raðir Preston í sumar en þar spilar hann með leikmanni frá Svartfjallalandi, framherjanum Milutin Osmaji?.

„Við ræddum þennan leik þegar við vorum í Englandi saman en ég hef ekkert heyrt í honum eftir að við fórum af stað. Ég mun tala við hann eftir leikinn. Mér finnst hann mjög góður leikmaður, hann er hraður og sterkur. Hann skoraði þrennu núna nýlega þegar við komumst áfram í bikarnum. Við þurfum að hafa augun á honum," sagði Stefán Teitur.

Óvæntar breytingar
Stefán Teitur gekk í raðir Preston í Championship-deildinni á Englandi í sumar eftir að hafa gert góða hluti með Silkeborg í Danmörku.

„Ég hef byrjað alla leikina í deildinni og við erum búnir að vinna tvo leiki í bikarnum. Ég átti mjög gott undirbúningstímabil en það var skrítið að þjálfarinn hætti eftir einn leik," sagði Stefán.

Ryan Lowe hætti sem stjóri Preston eftir aðeins einn leik á nýju tímabili.

„Þetta var mjög óvænt. Ég mæti og fæ að vita að hann hafi ákveðið að hætta. Hann tók stutta ræðu og svo var hann bara farinn. Hann taldi það best fyrir félagið, að hann myndi alltaf stoppa ef hann teldi sig ekki geta tekið liðið lengra. Maður verður bara að virða það," segir Skagamaðurinn og bætir við:

„Þjálfararnir sem eru komnir inn, mér líst mjög vel á þá. Það er kominn ferskur andi yfir marga leikmenn þarna."

Það hefur alltaf verið draumurinn
Skagamaðurinn er að upplifa drauminn, að spila fótbolta á Englandi.

„Ég er mjög stoltur af þessum skiptum og að vera að spila mikið. Þetta er mjög erfið deild en mér finnst þetta geggjað. Um leið og ég fékk að England væri möguleiki, þá sagði ég við umboðsmenn mína að það væri númer eitt," segir hann.

„Það hefur alltaf verið draumurinn að fara til Englands og þegar þetta tækifæri kom upp með Preston, þá lokaði ég á allt annað og vildi einbeita mér að því."

Það eru núna frekar margir Íslendingar komnir í enska boltann sem er skemmtilegt.

„Ég og Arnór Sigurðsson búum í sömu blokkinni í Manchester. Það er mjög gott að við höfum hvorn annan. Við höfum verið bestu vinir frá því að við vorum litlir krakkar. Við höfum talað um það þegar Blackburn og Preston spila eftir áramót að það muni koma 30 manna hópur af Skaganum. Það verður bara geggjað."

Allt viðtalið má sjá í spilaranum hér að ofan.