FH vann í dag góðan 4:2 sigur á KR í sannkölluðum botnbaráttuslag. Andrea Mist Pálsdóttir, leikmaður FH, var virkilega sátt með sigurinn:
Lestu um leikinn: FH 4 - 2 KR
"Ég er mjög sátt með þetta. Við vorum búnar að ákveða að koma sterkar til leiks eftir tapið í bikarnum sem var mjög súrt þar sem við vorum bara miklu betra liðið á vellinum. En við sýndum í dag að við erum með hörkulið og getum allt sem við ætlum okkur og skríðum upp töfluna hægt og rólega. Við erum að fara að næla í öll stig sem við getum og gott að byrja á þessum sigri í dag."
Hver var munurinn á þessum leik og tapinu gegn KR í bikarnum á fimmtudaginn síðasta?
"Bara baráttuviljinn. Ég held að við höfum verið liðið sem vildi þetta meira í dag og það skilaði okkur þessum sigri."
Andrea skoraði lokamark FH í leiknum beint úr aukaspyrnu.
"Ég ætlaði bara að setja boltann á fjær en einhvern veginn endaði boltinn í netinu sem var bara virkilega gaman. Í síðustu leikjum hafa aukaspyrnunar ekki alveg farið eins og þær eiga að fara en það kom í dag svo ég er virkilega sátt."
Næsti leikur FH er gegn Fylki á miðvikudaginn næstkomandi. Hvað þarf liðið að gera til að tryggja sigur þar?
"Koma sterkar til leiks og ef við spilum eins og í fyrri hálfleik hér þá tökum við 3 stig úr þeim leik."
Viðtalið við Andreu Mist má sjá í heild sinni í spilaranum hér að ofan.
