Marinó Axel Helgason er búinn að skrifa undir nýjan samning við Grindavík sem gildir út næstu tvö keppnistímabil, eða til 2022.
Marinó er uppalinn Grindvíkingur og á 88 leiki að baki fyrir félagið. Hann er fæddur 1997 og leikur sem hægri bakvörður.
Marinó lék 12 leiki í Lengjudeildinni í ár er Grindavík endaði í fjórða sæti, tíu stigum frá toppbaráttunni en með leik til góða.
„Knattspyrnudeild Grindavíkur fagnar því að einn af lykilmönnum liðsins hafi ákveðið að vera áfram hjá liðinu og taka slaginn í Lengjudeildinni á næstu leiktíð," segir í færslu Grindavíkur.
„Markmiðið er sannarlega að vera í toppbaráttunni á næstu leiktíð og berjast við að komast upp í efstu deild. Áframhaldandi vera Marinós hjá Grindavík er því mikið fagnaðarefni!"
Athugasemdir