„Þetta er rétt skref fyrir mig. Ég er að þróast sem leikmaður og hef spilað í tvö ár í efstu deild á Íslandi og með U21 landsliðinu. Ég er handviss um að ég geti hjálpað Silkeborg að ná sínum markmiðum og félagið getur hjálpað mér í minni þróun sem fótboltamaður og manneskja," segir Stefán Teitur.

Stefán Teitur hefur verið meðal betri leikmanna Pepsi Max-deildarinnar í sumar og er hann búinn að gera 8 mörk í 17 leikjum. Silkeborg leikur í dönsku B-deildinni og er með tólf stig eftir sex umferðir þar.

„Stefán passar vel inn í okkar leikmannahóp þar sem hann mun frá fyrsta degi gera tilkall í byrjunarliðið. Hann er leikmaður sem getur orðið enn betri og við viljum hjálpa honum að bæta sig því það hagnast bæði okkur og honum," segir Jesper Stüker, yfirmaður fótboltamála hjá Silkeborg.