Austurlandsmót: Leiknir F. leikið á als oddi

Leiknir Fáskruðsfirði vann býsna þægilegan sigur á Sindra í Austurlandsmótinu um helgina.

Ólafur Bernharð Hallgrímsson, strákur fæddur 2004, átti stórleik fyrir Leiknismenn og gerði fernu. Einnig voru Mykolas Krasnovskis, Stefán Ómar Magnússon og Valdimar Brimir Hilmarsson á skotskónum fyrir Leikni.

Kristinn Justiniano Snjólfsson skoraði mark Sindra þegar hann minnkaði muninn í 1-4 á 70. mínútu.

Leiknir hefur spilað afskaplega vel á mótinu og hefur unnið alla fjóra leiki sína til þessa og er liðið með markatöluna 29:3. Sindri er með fjögur stig eftir þrjá leiki og er í öðru sæti.

Leiknir er búið að leika gegn öllum liðum í mótinu en þetta er nýtt æfingamót sem hóf göngu sína á þessu ári. Fram kom í tilkynningu um mótið að fyrst yrði leikið með leikið með deildarfyrirkomulagi en síðar úrslitakeppni.