Sandra SIgurðardóttir, markvörður Vals í Pepsi Max-deildinni, var nokkuð brött þrátt fyrir markalaust jafntefli gegn Þrótturum í 2. umferð deildarinnar í kvöld.
Lestu um leikinn: Þróttur R. 0 - 0 Valur
Bæði lið fengu góð færi í leiknum til að skora en Þróttaraliðið var mjög agað og skipulagt í varnarleiknum og varð jafntefli niðurstaðan í Laugardalnum.
„Ég þarf að melta þetta aðeins. Mér finnst vanta alveg smá í okkar leik, bæði gæði og ákvarðanatökur. Ég ætla hins vegar ekki að taka neitt af Þróttaraliðinu sem var agað og skipulagt og var að berjast fyrir sínu," sagði Sandra við Fótbolta.net.
„Að vissu leyti vorum við heppnar því þær fá alveg sín færi ekki það að við hefðum alveg getað sett eitthvað í dag en svona fór þetta."
„Mér finnst við alveg vera búnar að undirbúa okkur fyrir það að þær geta náð í úrslit, skipulagðar og vita hvað þær ætla að gera. Þannig það var ekkert óvænt."
En hvað hefur vantað hjá Valsliðinu?
„Við þurfum að stilla okkur saman og skerpa á hausnum á okkur, hver og ein. Það vantar ekki gæðin hjá okkur en maður getur gert jafntefli og tapað í fótboltanum. Maður er ekkert alltaf geggjaður en fínt að hafa eitthvað sem maður getur lagað."
Breiðablik tapaði óvænt fyrir ÍBV í Eyjum, 4-2, en Sandra segir það fagnaðarefni að það sé komin svona mikil spenna.
„Ég held að þetta sýni að það er breyting á öllum liðum og liðin eru að bæta sig og hafa skipulagt sig vel og ég held þetta gæti verið mjög spennandi í sumar og vonandi verður það þannig, bara gaman," sagði hún í lokin.
Athugasemdir