Zrinjski Mostar 6 - 2 Breiðablik
1-0 Tomislav Kis ('2)
2-0 Matija Malekinusic ('21)
3-0 Tomislav Kis ('30)
4-0 Nemanja Bilbija ('32)
5-0 Matija Malekinusic ('41)
6-0 Antonio Ivancic ('55)
6-1 Anton Logi Lúðvíksson ('63)
6-2 Gísli Eyjólfsson ('74)
Rautt spjald: Viktor Karl Einarsson, Breiðablik ('31)
Lestu um leikinn: Zrinjski Mostar 6 - 2 Breiðablik
Breiðablik heimsótti Zrinjski Mostar til Bosníu í kvöld og átti gjörsamlega afleitan fyrri hálfleik.
Heimamenn í Zrinjski voru komnir með fimm marka forystu fyrir leikhlé og voru Blikar orðnir leikmanni færri eftir að Viktor Karl Einarsson nældi sér í tvö gul spjöld.
Heimamenn voru talsvert sterkari heldur en Blikar í fyrri hálfleik og var mikið um mistök í öftustu varnarlínu gestanna sem ferðuðust alla leið frá Kópavogi til að vera teknir í kennslustund.
Kópavogsstrákarnir eru þó snöggir að læra þar sem þeir mættu grimmir út í seinni hálfleikinn þrátt fyrir að vera leikmanni færri. Antonio Ivancic byrjaði þó á að skora sjötta mark heimamanna áður en tíu Blikar minnkuðu muninn með mörkum frá Antoni Loga Lúðvíkssyni og Gísla Eyjólfssyni.
Blikum tókst ekki að minnka muninn frekar og urðu lokatölur 6-2 í Bosníu. Blikar þurfa því stórsigur á heimavelli til að eiga möguleika á að komast áfram í næstu umferð í forkeppni fyrir Evrópudeildina. Sigurvegari viðureignarinnar mætir LASK Linz frá Austurríki í næstu umferð.
