Kári Árnason.
Kári Árnason, varnarmaður Víkings, mun fara í myndatöku í dag klukkan 16:00 til að skera úr um hversu alvarleg meiðsli hans eru. Kári meiddist aftan í læri undir lokin í 4-2 tapi Íslands gegn Albaníu í gær.
Arnar Gunnlaugsson, þjálfari Víkings, vonast eftir því besta en segir ólíklegt að Kári verði með í bikarúrslitaleiknum gegn FH á laugardaginn.
Arnar Gunnlaugsson, þjálfari Víkings, vonast eftir því besta en segir ólíklegt að Kári verði með í bikarúrslitaleiknum gegn FH á laugardaginn.
„Hann fer í myndatöku klukkan fjögur í dag en miðað við eigin reynslu og hvernig þetta leit út þá eru þetta 2-3 vikur. Við vonumst eftir því besta en óttumst það versta," sagði Arnar við Fótbolta.net í dag.
„Samkvæmt minni doktorsgráðu í meiðslum lítur þetta ekki vel út. Þá er þetta tækifæri fyrir aðra. Við munum klárlega mæta með ellefu leikmenn á laugardaginn. Það eru yngri leikmenn sem hafa stigið stórt skref í sumar þegar þeir hafa fengið ákveðnar mínútur og þeir verða tilbúnir, trúðu mér."
Kári er uppalinn Víkingur og kom aftur til félagsins í sumar eftir langan feril í atvinnumennsku erlendis.
„Ég er hrikalega leiður fyrir hans hönd ef hann nær ekki leiknum. Hann er Víkingur út í gegn og það er versta mál ef hann nær ekki leiknum," sagði Arnar.
Hér að ofan má sjá viðtalið við Arnar.
