Elías að glíma við meiðsli - Alfreð og Sævar Atli byrja hjá Lyngby

Núna klukkan 12 eru að hefjast tveir leikir í dönsku úrvalsdeildinni. Nordsjælland tekur á móti Midtjylland og AaB Álaborg leikur gegn Lyngby.

Íslenski landsliðsmarkvörðurinn Elías Rafn Ólafsson er ekki í leikmannahópi Mitdjylland en samkvæmt heimasíðu félagsins er hann að glíma við smávægileg meiðsli og ætti að snúa aftur á næstu dögum.

Á föstudaginn verður opinberaður landsliðshópur Íslands sem er að fara að leika tvo leiki; vináttuleik gegn Venesúela í Austurríki og svo Þjóðadeildarleik gegn Albaníu í Tirana sem fram fer 27. september.

Elías hefur misst sæti sitt hjá Midtjylland og vermt varamannabekkinn síðustu tvo leiki. Jonas Lössl hefur staðið í markinu. Midtjylland hefur ekki farið vel af stað á tímabilinu og situr í 9. sæti.