ÍBV hefur bætt framherja við leikmannahóp sinn fyrir átökin í Lengjudeildinni.
„ÍBV hefur gert samning við Seku Canneh út tímabilið. Seku hefur víða komið við á sínum ferli en mikil ánægja er með að þessi öflugi framherji sé á leið til Eyja. Velkominn Seku og áfram ÍBV, alltaf, alls staðar," segir tilkynningu ÍBV.
Canneh er 25 ára gamall og er fæddur í Líberíu. Hann ólst upp í Hollandi og var meðal annars í akademíu Ajax.
Hann skoraði 11 mörk í 45 leikjum í hollensku B-deildinni með Fortuna Sittard og FC Oss snemma á ferlinum. Síðustu ár hefur hann spilað í Bandaríkjunum, Serbíu og Suður-Kóreu. Síðast var hann á mála hjá Las Vegas Lights í Bandaríkjunum.
Sóknarmaðurinn Gary Martin var rekinn frá ÍBV fyrir byrjun Íslandsmótsins vegna agabrots. ÍBV fékk Stefán Inga Sigurðarson á láni frá Breiðabliki en hann meiddist í fyrsta leik með Vestmannaeyingum í Mjólkurbikarnum.
ÍBV tapaði fyrsta leik sínum í Lengjudeildinni gegn Grindavík, 3-1, en fyrr í dag samdi félagið við Atla Hrafn Andrason.
Athugasemdir