Leiknir tekur á móti Selfossi í 2. umferð Lengjudeildar karla í kvöld en að þessu sinni er leikið á gervigrasvelli Leiknis því grasvöllurinn er ekki klár. Leikurinn hefst klukkkan 19:15.
Fyrir leikinn ætla Leiknismenn að bjóða upp á sögustund með Davíð Snorra Jónassyni þjálfara U21 árs landsliðs Íslands og Frey Alexanderssyni þjálfara Lyngby í Danmörku.
Davíð Snorri og Freyr stýrðu Leiknisliðinu árið 2014 þegar liðið vann sig í fyrsta sinn upp í efstu deild og héldu svo áfram ævintýrinu í efstu deild ári síðar.
Davíð mun stýra sögustund frá klukkan 17:30 og rifja upp þessi tvö ár. Allir eru velkomnir að fylgjast með og spyrja hann spjörunum úr.
Gegnum tæknina verður Freyr líka með í félagsheimilinu þegar kafað verður djúpt í hvernig strákarnir afrekuðu það að koma litla félaginu okkar í efstu deild íslenskrar knattspyrnu í fyrsta sinn.
Ársmiðar verða til sölu á staðnum auk þess sem hægt verður að máta Errea treyjustærðir fyrir þá sem hafa hug á að festa kaup á stórglæsilegri afmælistreyju félagsins sem verður framleidd í afar takmörkuðu upplagi og aðeins einni umferð. Þess má geta að ársmiðahafar munu fá forgang á kaupum á þeim treyjum. Meira um það síðar.
