„Tilfinningin er slæm," sagði Jón Stefán Jónsson annar þjálfara Þórs/KA eftir 3-3 jafntefli gegn KR á SaltPay Vellinum á Aureyri í kvöld.
Lestu um leikinn: Þór/KA 3 - 3 KR
„Við eigum að vinna svona leik, eins mikið og maður á að vinna leiki, við ætlum okkur að vinna alla heimaleiki það eru fyrst og fremst vonbrigðin alveg óháð andstæðingnum."
Hann vildi lítið tjá sig um hvað fór fram í klefanum í hálfleik, hann var augljóslega ekki sáttur með frammistöðuna í fyrri hálfleiknum.
„Ég held að það sé ágætt að vera ekkert að hafa það eftir sem var sagt í hálfleik. Frammistaðan í fyrri hálfleik var ekki bara ekki góð, hún var ömurleg og óboðleg. Ef við hefðum spilað allan leikinn eins og í seinni hálfleik þá held ég að við báðir hefðum vitað hvernig þessi leikur hefði endað."
Jón Stefán var ekki ánægður með mörkin sem liðið fékk á sig í kvöld. Hann var ósáttur með varnarleik liðsins frá fremsta manni, liðið hefur fengið á sig 19 mörk í síðustu fimm deildarleikjum.
„Það gefur augaleið að þú vinnur ekki leiki þannig. Við erum að díla við einbeitingaleysi, allt í einu slokknar á okkur, það er mjög klassískt fyrir ung lið að það gerist en ég er ekki mjög áhyggjufullur yfir þessu."
