Palli Gísla, Páll Viðar Gíslason, þjálfari Þórsara, hafði ekki undan að svara spurningaflóði fréttaritara eftir mikinn markaleik Þórsara gegn Leikni á Domusnova vellinum í Breiðholti í dag.

„Það væri galið [að vera sáttur] þetta stefndi í 7, 8-0. Ég þekkti ekki einn einasta leikmann í mínu liði í fyrri hálfleik og það var notaleg stund sem við áttum í hálfleik til að fara yfir málin. Þetta er ekki boðlegt fyrir lið sem ætlar að láta taka sig alvarlega í toppbaráttunni að sýna svona frammistöðu í fyrri hálfleik, sagði Palli.

Lestu um leikinn: Leiknir R. 3 -  3 Þór

„Sömu leikmenn, sama leikskipulag allt saman eins en það var eins og ég hefði skipt öllum út af og nýir komið inn í sömu stöður. Þetta er ekki boðlegt í tuttugasta skiptið. Við gætum montað okkur fyrir að hafa komið til baka eftir að hafa skitið á okkur í fyrri hálfleik. Þetta stefndi í sama rústið og var gegn Fram í síðasta leik."

„Það var mjög gott [að fá mark inn rétt fyrir hálfleik] og ég kannaðist við flesta mína leikmenn í seinni hálfleik. Mjög kjánalegt að upplifa seinni hálfleikinn eins og okkur langaði til að vinna hann en ekki bara að ná að jafna. Auðvitað virði ég stigið í Breiðholti og með því fáum við þá ekki lengra fram úr okkur. Vonandi getum við haldið áfram að trúa því að við getum verið í toppbaráttunni."

„Við ætluðum okkur að reyna sækja sigurinn og skilja þá menn eftir berrassaða annað en við ætluðum í fyrri hálfleik. Eftir á var kannski hrokafullt að ætla sækja sigurmark en svo undir lokin var maður með kökk í hálsinum þegar þeir fengu hornspyrnur og fyrirgjafir, við manni færri og auðvitað hefði verið sárt að fá niðurgang undir lokin eftir að hafa þrifið upp eftir sig."

Seinna gula?
Markvörður Leiknis, Guy Smit, braut á Guðna Sigþórssyni inn á vítateig og vítaspyrna var dæmd. Smit hafði skömmu áður fengið gula spjaldið fyrir að mótmæla öðru marki Þórsara. Var Palli einn af þeim Þórsurum sem vildi sjá Guy fá seinna gula og þar með rautt?

„Já. Ég er enginn sérfræðingur í dómarafræðum en ef þú færð ekki einu sinni gult spjald fyrir þetta þá skil ég ekki hvernig hægt er að nota þessi spjöld á réttan hátt og hafa samræmi í þessu öllu saman. Kannski fyrir okkur var þetta geggjuð ákvörðun fyrir okkur því við höfum sögu af því að vera ekki alveg á diskógólfinu þegar við lendum einum fleiri."

Ætlaði að taka á sig gula spjaldið
Í uppbótartíma fékk varamaðurinn Guðni Sigþórsson að líta beint rautt spjald fyrir að renna sér og fara aftan í kálfann á Sævari Atla Magnússyni. Palli var beðinn um sína upplifun á atvikinu.

„Hann sagði við mig eftir leik að hann hafi ætlað að taka á sig gult spjald. Þetta leit illa út því hann var kominn í blautt grasið og vissi upp á sig skömmina. Það var enginn ásetningur að meiða leikmanninn. Vissulega klaufalegt rautt spjald," sagði Palli að lokum.

Viðtalið í heild sinni má sjá í spilaranum hér að ofan.

STUÐNINGSSVEIT
FÓTBOLTA.NET

Okkur er full alvara!

Umfjöllun síðustu daga hefur Fótbolti.net sýnt að við ætlum að bæta í umfjöllun um fótbolta.

Okkur er full alvara með það!

Gakktu í stuðningssveitina og hjálpaðu okkur að tryggja áframhaldandi öfluga umfjöllun um fótbolta.

STYRKJA

Tweet

Senda a Facebook Hafdu samband Senda frétt Prenta frétt Frétta leit