The Times greinir frá því að Leeds United, West Bromwich Albion, Fulham, Brentford, Nottingham Forest and Preston North End, félögin í sex efstu sætum Championship hafi haldið neyðarfund til að ræða stöðuna. Annar fundur með öllum 24 félögum Championship verður haldinn á morgun.

Félögin eru sögð vægast sagt ósátt við þær yfirlýsingar sem hafa komið frá ákveðnum úrvalsdeildarfélögum um að hætta tímabilinu út af kórónuveirunni.

Karren Brady, varaformaður West Ham, skrifaði pistil í The Sun um liðna helgi þar sem hún sagði: „Það eina sanngjarna í stöðunni er að hætta við tímabilið." Þess má geta að West Ham er í fallbaráttu.

Keppni í öllum deildum Englands hefur verið frestað þangað til í apríl út af veirunni.

Félögin í efstu sex sætum Championship vilja að tímabilið verði klárað, jafnvel þó að það þýði að byrjun næsta tímabils verði seinkað. Félögin vilja líka að öll þrjú sætin upp í úrvalsdeild verði vernduð, en sú hugmynd hefur komið upp að setja tvö efstu liðin, Leeds og West Brom, upp og vera með 22 liða úrvalsdeild á næsta tímabil.

Búist er við því að Evrópumótinu, sem átti að fara fram í sumar, verði frestað á morgun. Það ætti að gefa deildarkeppnum sveigjanleika til að klárast þegar líður á sumarið.