Þrjú af yngri landsliðum Íslands verða í eldlínunni á þessum ágæta þriðjudegi.
U17 landslið karla mætir Ungverjalandi í fyrsta leik liðsins á Telki Cup. Mótið er haldið í Ungverjalandi og taka Króatía og Tyrkland einnig þátt á því.
Ísland mætir Tyrklandi svo á fimmtudag og Króatíu á laugardag. Leikurinn gegn Ungverjalandi fer fram á Globall Football Park og hefst hann klukkan 15:00 að íslenskum tíma.
Allir leikirnir verða í beinu streymi og verður hægt að nálgast hlekki á þá á miðlum KSÍ.
Þá mæta U15 landslið karla og kvenna liðum Færeyja en báðir leikirnir eru í Færeyjum.
Liðin leika bæði tvo vináttuleiki við Færeyjar í vikunni, en seinni leikirnir fara fram á fimmtudag.
Strákarnir í U15 hefja leik klukkan 14:00 í dag og stelpurnar byrja sinn leik klukkan 16:30. Hægt verður að horfa á leikinn í beinu streymi á vef færeyska sjónvarpsins.
Athugasemdir