Berglind Björg Þorvaldsdóttir var kát eftir sigur í úrslitaleik Mjólkurbikarsins í dag. Breiðablik hafði þar betur eftir framlengdan leik gegn FH.
Lestu um leikinn: FH 2 - 3 Breiðablik
Berglind lagði fyrra jöfnunarmark Blika upp á 32. mínútu þegar hún gerði mjög vel að taka á móti boltanum og skila honum á Samantha Smith sem kláraði vel.
„Þetta er ótrúleg tilfinning, það er í rauninni ekkert í líkingu við að vinna bikarinn. Þetta er fáránlega skemmtilegt," sagði Berglind sem vann bikarinn einnig í fyrra en þá var hún í liði Vals. Hún kom inn af bekknum í úrslitaleiknum í fyrra og tók þátt í 2-1 sigri gegn Blikum.
„Þetta er skemmtilegra núna heldur en í fyrra því ég er að vinna með uppeldisklúbbnum mínum."
Berglind segir að leikurinn hafi verið ótrúlega erfiður og mögulega einn sá erfiðasti sem hún hefur nokkurn tímann spilað á ferlinum.
„Þetta hefur verið skemmtilegur leikur fyrir áhorfendur en ég er extra ánægð með þennan sigur. Ég var svo stressuð undir lokin að ég hélt ég myndi æla þarna á bekknum. Það var gott að sigla þessu heim. Við erum með geggjaða stuðningsmenn og unnum þetta fyrir þau."
16.08.2025 18:56
Mjólkurbikar kvenna: Breiðablik bikarmeistari eftir þriggja ára bið
