Leikmennirnir voru báðir teknir út úr Football Manager og FIFA, vinsælustu fótbolta tölvuleikjum heimsins, eftir að þeir voru settir í bann.

Gylfi var til rannsóknar vegna brots gegn ólögráða einstaklingi og spilaði ekki með Everton í tæp tvö ár áður en málið var látið niður falla.

Greenwood var handtekinn snemma á síðasta ári eftir að kærasta hans, Harriet Robson, deildi myndefni af áverkum sínum sem hún sagði vera af hendi Greenwood , ásamt því að deila hljóðupptöku þar sem hann reynir að þvinga hana til samræðis.

Það mál var einnig látið niður falla eftir að ný sönnunargögn komu upp á yfirborðið.

Sports Interactive, framleiðandi Football Manager, hefur alla tíð sagt að ef leikmaður er til rannsóknar af lögregluyfirvöldum, þá verði sá og hinn sami ekki í leiknum eða fjarlægður í næstu uppfærslu. Það var gert við bæði Greenwood og Gylfa en þeir voru ekki í Football Manager 2023, sem kom út á síðasta ári. Gylfi var ekki heldur í leiknum sem kom árið á undan.

Greenwood og Gylfi voru báðir í FIFA 22, sem kom út árið 2021, en Greenwood var fjarlægður úr leiknum snemma í febrúar 2022. Þó gátu spilarar enn notað hann í Ultimate Team, þar sem hægt er að búa til eigið draumalið.

Hvorugur þeirra var í FIFA 23 leiknum en þeir koma nú með endurkomu í nýjustu útgáfunni, EA Sports FC 24.

Gylfi Þór samdi á dögunum við Lyngby á meðan Greenwood var lánaður til Getafe á Spáni.

Spilarar þurfa þó að bíða þolinmóðir eftir endukomu þeirra þar sem fresturinn til að skila gögnum til EA var runninn út.

Ekki er ljóst hvenær þeir mæta í leikinn, en það má áætla að það verði í janúar, í kringum gluggalok.

Báðir verða hins vegar í Football Manager 2024 sem kemur 6. nóvember.

Algjörlega óvíst hvað verður um Antony

Antony, leikmaður Manchester United, er í launuðu leyfi frá störfum og má því ekki æfa né spila með liðinu á meðan hann er til rannsóknar vegna líkamsárásar á fyrrverandi kærustu sína, Gabrielu Cavallin.

Leikmaðurinn samþykkti að fara í leyfi en samkvæmt reglunum verður hann ekki í nýju útgáfunni af Football Manager. Hann er hins vegar í EA Sports FC 24 og er alveg óljóst hvort hann verði áfram þar en framleiðandinn fylgist væntanlega grannt með stöðu mála.