Eiður Aron er að eiga frábært tímabil
Eiður Aron Sigurbjörnsson var maður leiksins er Vestri vann Þór 2-0 og kom sér í undanúrslit Mjólkurbikarsins í kvöld.
Lestu um leikinn: Vestri 2 - 0 Þór
Miðvörðurinn er að eiga frábært tímabil á Ísafirði. Vestri er í toppbaráttu í Bestu deildinni og er nú aðeins einum leik frá því að komast í bikarúrslit.
Hann kom að báðum mörkum Vestra og var valinn bestur af Fótbolta.net í leiknum í kvöld.
„Já, bara flott. Ég reyni að gera eitthvað í þessum föstu leikatriðum og með fínar sendingar inn fyrir og höldum síðan hreinu. Þetta er frábær dagur,“ sagði Eiður Aron við Fótbolta.net.
Eiður Aron er að elska lífið á Ísafirði og talaði aðeins um muninn á liðinu í ár og í fyrra.
„Það er náttúrulega bara frábært að vera hérna. Þetta er geggjaður hópur. Munurinn á árinu í ár og í fyrra er að meiðslin í fyrra voru endalaus en við erum að sleppa við það núna. Hópurinn hefur verið að æfa allan tímann saman og erum bara að ná að æfa hluti sem eru að skila sér á vellinum.“
Varnarmaðurinn á sér engan óska mótherja í undanúrslitunum.
„Neinei, erum ekkert að pæla í því. Við erum bara að pæla í FH á sunnudaginn og svo kemur hitt bara í ljós,“ sagði hann í lokin.
