Alexandra segir í viðtali á heimasíðu Frankfurt að hún hafi rætt við Söru Björk Gunnarsdóttur um þýsku deildina og að hún hafi verið ánægð með það sem kom fram í spjalli við iko Arnautis, þjálfara Frankfurt.

„Mér hefur verið vel tekið í Frankfurt af nýjum liðsfélögum og þjálfarateyminu og ég hlakka til að takast á við áskorunina að spila í sterkri deild í Þýskalandi," segir Alexandra.

Hin tvítuga Alexandra er uppalin hjá Haukum en hún hefur spilað með Breiðabliki undanfarin þrjú ár.

Alexandra hefur skorað 28 mörk í 67 leikjum í Pepsi Max-deildinni en hún hefur einnig skorað tvö mörk í tíu leikjum með íslenska A-landsliðinu.

Frankfurt er í 6. sæti af tólf liðum í þýsku Bundelsligunni í augnablikinu en keppni hefst aftur þar í febrúar eftir vetrarfrí.

Alexandra er þriðji leikmaðurinn úr Íslandsmeistaraliði Breiðabliks sem fer í þýsku Bundesliguna í vetur. Karólína Lea Vilhjálmsdóttir fór á dögunum til toppliðs Bayern Munchen og Sveindís Jane Jónsdóttir, sem var á láni frá Keflavík, fór til Wolfsburg.

Berglind Björg Þorvaldsdóttir fór til Le Havre undir lok síðasta tímabils og að auki hefur markvörðurinn Sonný Lára Þráinsdóttir ákveðið að leggja hanskana á hilluna.