Valgeir lét Davíð finna fyrir sér í leiknum og sagði í spjalli við Fótbolta.net svo frá: „Það var ógeðslega skemmtilegt. Maður vissi alveg hver hann var fyrir leikinn, algjör goðsögn hjá FH. Ég hef virkilega gaman að því að vera í einvígum við menn. Ég þekki hann því við vorum saman í líkamsrækt hjá Spörtu. Hann hefur hjálpað mér mikið með fótboltann og er frábær náungi."

Orðin „hann hefur hjálpað mér mikið með fótboltann" vöktu athygli fréttaritara. Það skal tekið fram að undirritaður efast ekki um að Davíð sé frábær náungi, sennilega hefur enginn verið nefndur oftar 'mest óþolandi andstæðingur' í hinni hliðinni en einmitt Davíð Þór, fyrir utan mögulega Jóhann Helga Hannesson. Hitt vakti einfaldlega meiri athygli á þessum tímapunkti. Valgeir var spurður út í hjálp Davíðs:

Hvernig hefur Davíð Þór hjálpað þér með fótboltann?

„Við Davíð vorum báðir hjá líkamsræktarstöðinni Spörtu, við áttum gott spjall saman einn daginn. Hann leiðbeindi mér og hjálpaði mér með marga hluti," sagði Valgeir.

„Það sem ég tók helst út úr samtalinu okkar saman voru sögurnar hans frá atvinnumennsku. Hann sagði mér að í atvinnumennsku þarftu að hafa hausinn í lagi og sýna þolinmæði. Síðan sagði hann við mig að vera áfram leiðinlegur inn á vellinum og gefa ekkert eftir, bæði á æfingum og í leikjum," bætti Valgeir við.

Viðtalið við Valgeir:
Valgeir „gæti eiginlega ekki verið sáttari" hjá Brentford og dreymir um lokakeppnina