Klopp segir að Origi sé goðsögn og óskar Everton til hamingju

„Ég á von á því að Div fái sérstakar móttökur og verði kvaddur á sérstakan hátt. Hann er Liverpool goðsögn. Hann er einn mikilvægasti leikmaður sem ég hef haft," segir Klopp.

„Það var og er algjör ánægja að vinna með honum. Hann er ekki farinn en hann á skilið allt það besta. Hvert sem hann fer þá mun honum vegna vel. Þegar ég hugsa um Div þá koma svo magnaðar stundir upop í hugann. Hann er Liverpool goðsögn, það er klárt."

Sjá einnig:
Klopp um lokaumferðina og stöðuna á hópnum

Á fréttamannafundinum óskaði hann grönnunum og erkifjendunum í Everton til hamingju með að halda sæti sínu en það varð ljóst eftir endurkomusigur liðsins gegn Crystal Palace í gær. Gríðarlegur fögnuður braust út á Goodison Park og fjöldi fólks streymdi úr stúkunum og út á völlinn sjálfan.

Mikil umræða er á Englandi um að áhorfendur vaði inn á völlinn en stuðningsmaður Nottingham Forest réðist á Billy Sharp í vikunni.

„Það getur verið hættulegt þegar áhorfendur fara inn á völlinn. Ég veit ekki hvernig á að koma í veg fyrir að svona gerist. Ég vil ekki dæma því ég skil tilfinningarnar sem skapast. Ég vona samt að við lærum af þessu. Við getum fagnað án þess að setja annað fólk í hættu," segir Klopp.