Enski varnarmaðurinn Luke Shaw verður frá næstu mánuði vegna vöðvameiðsla en þetta kemur fram í tilkynningu frá Manchester United í kvöld.
Shaw, sem er einn af mikilvægustu leikmönnum liðsins, fór meiddur af velli í fyrri hálfleik í sigri liðsins á Luton um helgina.
Englendingurinn hefur verið að glíma við erfið meiðsli síðasta árið en hann var frá fyrstu þrjá mánuði tímabilsins.
Enskir miðlar greindu frá því í dag að Shaw yrði líklega ekki meira með á tímabilinu, en Manchester United hefur nú staðfest meiðsli Shaw en gaf ekki nákvæma tímasetningu á endurkomu hans.
Þar kemur fram að hann verður frá næstu mánuði en enskir miðlar eru flestir á því að hann verði frá næstu tólf vikur.
„Luke Shaw meiddist á vöðva og verður frá í langan tíma. Það þarf að skoða stöðuna betur til þess að vita alvarleika meiðslana, en við búumst við því að hann verði frá næstu mánuði,“ segir í yfirlýsingunni.
Möguleiki er á að hann nái síðustu leikjum tímabilsins, sem yrði afar mikilvægt fyrir hann og mögulega þátttöku hans með enska landsliðinu á Evrópumótinu í sumar.
Óvíst er hvað Erik ten Hag, stjóri United, gerir núna. Hann gæti fært Diogo Dalot í vinstri bakvörðinn og spilað Victor Lindelöf hægra megin eða sett Sofyan Amrabat í vinstri bakvörðinn.
Athugasemdir