Franska félagið Paris Saint Germain mun reka þá Leonardo og Mauricio Pochettino frá félaginu á næstu dögum en þetta skrifa virtustu miðlarnir í Frakklandi.
Mbappe framlengdi samning sinn við Parísarfélagið í kvöld og skrifaði undir til næstu þriggja ára.
Þetta er stærsti samningur í sögu fótboltans en Mbappe mun einnig fá völd bakvið tjöldin. Hann fær að koma að ráðningu á nýjum yfirmanni knattspyrnumála, þjálfara og þá fær hann að velja leikmenn inn í hópinn, fyrir utan himinháu launin sem hann mun þéna.
PSG ætlar strax að ráðast í framkvæmdir. Leonardo, sem hefur sinnt stöðu yfirmanns knattspyrnumála, verður látinn fara á næstu dögum en það er ósk Mbappe að fá Luis Campos.
Mbappe og Campos unnu saman hjá Mónakó og væri Frakkinn til í að endurnýja kynnin.
Pochettino verður einnig látinn fara og segja franskir fjölmiðlar að félagið ætli að gera allt til að fá Zinedine Zidane í stað hans. Þetta segir franski blaðamaðurinn Julien Laurens.
Þá bað Mbappe um að fá Ousmane Dembele, leikmann Barcelona, en hann tæki við stöðunni af Angel Di Maria sem yfirgefur félagið í sumar. PSG er búið að opna viðræður við föruneyti Dembele.
Athugasemdir