Juventus mætir Lyon í Frakklandi
Fjórir leikir fara fram í lokaumferðinni í riðlakeppni Meistaradeildar Evrópu í kvennaflokki en hæst ber að nefna leik Lyon og Juventus í C-riðli.
Íslenski landsliðsfyrirliðinn Sara Björk Gunnarsdóttir og stöllur hennar í Juventus heimsækja Lyon klukkan 17:45, en það er allt undir í þeim leik.
Juventus er með 8 stig í 3. sæti en Lyon í öðru sæti með 10 stig. Lyon er ríkjandi meistari í keppninni en Sara vonast til að geta sent gömlu liðsfélagana snemma í frí.
Glódís Perla Viggósdóttir verður þá í eldlínunni hjá Bayern München sem mætir Benfica. Bayern er komið áfram og þá á Benfica ekki möguleika á að komast upp úr riðlinum. Karólína Lea Vilhjálmsdóttir gæti snúið aftur á völlinn eftir erfið meiðsli.
Guðrún Arnardóttir mun þá spila með sænska liðinu Rosengård gegn Barcelona en spænska liðið er í efsta sæti riðilsins og er komið áfram eins og Bayern. Rosengård er án stiga.
Leikir dagsins:
17:45 Zurich - Arsenal
17:45 Lyon - Juventus
20:00 Bayern - SL Benfica
20:00 Barcelona - Rosengard
Athugasemdir
