Danny El-Hage, markvörður Leiknis Fáskrúðsfirði, meiddist í æfingaleik gegn Hetti/Hugin síðasta laugardag og verður frá næstu mánuðina.
Fram kemur í tilkynningu Leiknis að hann gæti misst af öllu tímabilinu.
„Hann marg kjálkabrotnaði og í aðgerð síðastliðinn sunnudag voru settar í hann tvær stálplötur og átta skrúfur. Honum heilsast þó furðu vel og er grjótharður á að koma enn öflugri til baka sem allra fyrst," segir í tilkynningunni.
„Leikurinn var flautaður af á 65 mínútu eftir atvikið en þá var staðan 4-0 fyrir okkar menn. Danny spurði liggjandi á vellinum með kjálkabeinið standandi út úr annarri kinninni hvort hann hefði ekki varið - sem hann vissulega gerði."
Danny, sem er af pólsku og líbanonsku bergi brotinn, lék með liðinu á síðasta tímabili og spilaði þá níu leiki í Lengjudeildinni.
Það er því spurning hver verður í markinu hjá Leikni í 2. deild karla í sumar.
Athugasemdir