Lestu um leikinn: Valur 0 -  0 Keflavík

„Ekki okkar besti leikur en engu að síður fannst mér við gera nóg til þess að skora eitt mark og vinna leikinn. Við sköpuðum okkur alveg nóg en hefði alveg viljað skapa meira því við vorum það mikið með boltann en bara svekktur með að fá ekki neitt úr þessum leik." sagði Arnar Grétarsson þjálfari Vals í viðtali eftir leikinn.

Það er ótrúlegt að Tryggvi Hrafn Haraldsson hafi ekki náð að skora í leiknum. Hann fékk tvö dauðafæri, þar á meðal snemma leiks þar sem markið var nánast opið fyrir framan hann en átti skringilegt skot sem náði ekki á rammann.

„Tryggvi fékk tvö dauðafæri sem fóru forgörðum. Sennilega fáir svekktari en einmitt hann eftir leikinn í dag. Færanýting Vals var slæm," skrifaði Stefán Marteinn Ólafsson, fréttamaður Fótbolta.net, í skýrslu sinni um leikinn.

Valur er fimm stigum frá toppliði Víkings eftir leikina í gær en Keflavík er áfram í fallsæti.