Höfuðborgarliðin á Ítalíu eru að breyta til í herbúðum sínum fyrir næstu leiktíð.
Lazio var að krækja í brasilíska miðjumanninn Marcos Antonio frá úkraínska félaginu Shakhtar Donetsk fyrir 8 milljónir evra auk aukagreiðslna.
Antonio er 22 ára og hefur skorað 9 mörk í 69 leikjum hjá Shakhtar. Hann hefur spilað 29 leiki fyrir yngri landslið Brasilíu, þar af tvo fyrir U23 liðið.
Antonio mun fylla í skarðið sem Lucas Leiva skilur eftir sig þegar hann yfirgefur félagið á frjálsri sölu.
Nágrannarnir í Roma eru þá búnir að losa sig við bandaríska bakvörðinn Bryan Reynolds.
Reynolds er tvítugur hægri bakvörður sem fer á eins árs lánssamning til Club Brugge með 7 milljón evru kaupmöguleika.
Reynolds þótti mikið efni þegar Roma vann kapphlaupið um hann í fyrra en hann hefur ekki staðist væntingar á Ítalíu. Hann á 8 leiki fyrir Roma en hefur verið öflugur í bakvarðarstöðunni hjá Kortrijk í vor.
Reynolds á tvo leiki að baki fyrir A-landslið Bandaríkjanna eftir að hafa verið lykilmaður í U17 liðinu.
