Byrjunarlið ÍBV og Fram: Óbreytt hjá Fram en markmannsskipti og þrjár aðrar breytingar ÍBV

ÍBV gerði 2 - 2 jafntefli við Fylki í Árbænum í síðasta leik sem fór fram á mánudaginn var. Hermann Hreiðarsson þjálfari liðsins gerir fjórar breytingar frá þeim leik. Alex Freyr Hilmarsson og Richard King leikmenn ÍBV taka út leikbann vegna 4 áminninga í sumar.

Það eru markmannsskipti hjá ÍBV því Jón Kristinn Elísson kemur inn í markið fyrir Guy Smit sem er ekki í hóp, eftir að hafa fengið höfuðhögg í síðasta leik. Inn í liðið koma líka Guðjón Ernir Hrafnkelsson, Sverrir Páll Hjaltested og Viggó Valgeirsson en auk þeira sem áður voru nefndir er Halldór Jón Sigurður Þórðarson ekki í hóp hjá ÍBV eftir að hafa byrjað síðast.

Viggó Valgeirsson fæddur 2006 er í byrjunarliði ÍBV í dag. Þetta er fyrsti leikur hans í byrjunarliði ÍBV en hann hafði áður komið inná sem varamaður í uppbótartíma gegn FH í Kaplakrika 13. ágúst.

Fram gerði 1 - 1 jafntefli við HK í Kórnum í síðasta leik sem fór fram á sunnudaginn. Ragnar Sigurðsson þjálfari liðsins gerir engar breytingar frá þeim leik.