Viktor Örn eftir að hafa skrifað undir samning.
Tómas Joð Þorsteinsson.
Tómas Joð Þorsteinsson og Viktor Örn Guðmundsson, leikmenn Fylkis, voru gestir útvarpsþáttarins Fótbolti.net á X-inu FM 97,7 á laugardag. Í spilaranum hér að ofan má heyra þann hluta viðtalsins þar sem rætt var um Fylki og íslenska boltann.
Viktor kom til Fylkis frá FH síðasta haust.
„Ég vildi spila meira og leist vel á það sem Ási hafði upp á að bjóða," segir Viktor sem er þekktur sem vinstri bakvörður en hefur verið að leika sem sóknarmiðjumaður á uundirbúningstímabilinu. Hann vonast eftir að ná að festa sig í sessi þar.
„Ég er að finna mig ágætlega þar og fíla það mjög vel. Ég hef spilað flest alla leiki þarna í vetur og stundum verið færður í vinstri bakvörðinn þegar líða fer á leikina."
Missir af Ásgeiri Berki og Viðari úr klefanum
Fylkismenn hafa misst tvo lykilmenn frá síðasta tímabili sem eru farnir erlendis í atvinnumennsku, það eru Ásgeir Börkur Ásgeirsson og Viðar Örn Kjartansson.
„Þeir skilja báðir eftir sig skarð, ekki bara á vellinum heldur líka klefalega séð," segir Tómas Joð.
„Ásgeir Börkur styrkir liðið gríðarlega í því sem hann gerir. Maður tók vel eftir því þegar hann kom frá Sarpsborg síðasta sumar hversu mikið hann er að spila upp á styrkleika sína og hversu mikill kostur það var. Einn af hans helstu kostum er hve mikið hann smitar út frá sér og rífur upp sjálfstraustið hjá öðrum. Svo er hann algjör höfðingi í klefanum."
Hemmi Hreiðars æfir með Fylki
Hermann Hreiðarsson æfir með Fylki einu sinni í viku. Hann er ekki að ganga í raðir félagsins en heldur sér í formi.
„Hann er að halda sér í kjörþyngd held ég. Hann mætir með okkur í Egilshöllina á þriðjudögum. Hann nennir ekki að æfa úti og ég skil það vel. Það er frábært að hafa hann. Hann lífgar upp á hlutina, er með brandara og miðlar af reynslu. Svo er hann ennþá góður í fótbolta og frábært að fá hann inn á æfingar," segir Tómas.
Viðtalið má heyra í spilaranum hér að ofan en þar er meðal annars rætt frekar um leikmannahóp Fylkis, sumarið framundan og "Joð" nafnið sem Tómas reynir að fá samþykkt hjá mannanafnanefnd.
Athugasemdir
