„Ég myndi segja að við verðum að vera sáttir við þessi úrslit úr því sem komið var. Við vorum ekki að spila nógu vel í fyrri hálfleik og grófum okkur djúpa holu en við mokuðum okkur upp úr henni. “ Sagði Guðjón Pétur Lýðsson leikmaður Grindavíkur eftir 2-2 jafntefli Grindavíkur gegn Vestra í dag en Grindavík kom til baka úr 0-2 stöðu með tveimur mörkum á síðustu 10 mínútum leiksins.
Lestu um leikinn: Grindavík 2 - 2 Vestri
Grindavíkurliðið var að leika sinn fjórða leik á 14 dögum í dag og var tempóið í leiknum lengst af ansi lágt. Er leikjaálag að segja til sín hjá liðinu að mati Guðjóns?
„Nei ég myndi nú ekki segja það. Við byrjuðum keimlíkt í KV leiknum, vorum ekki nógu góðir og ekki nógu nálægt mönnunum okkar og svo virðist sem menn þurfi smá högg í andlitið til þess að þora að stíga upp
og taka þessa aukametra sem þarf. Um leið og við gerðum það í dag þá vorum við hættulegir og sköpuðum færi og erum góðir.“
Nú þegar stutt er í mótslok og að litlu að keppa fyrir lið Grindavíkur. Er Guðjón og aðrir að líta á síðustu leiki mótsins sem upphafið að undirbúningi fyrir næsta tímabil?
„Alveg hundrað prósent. Það er góður efniviður hér í Grindavík og við erum með góðan kjarna og með nokkrum viðbótum getum við klárlega gert atlögu að því að fara upp á næsta ári það er allavega stefnan. “
Sagði Guðjón Pétur en allt viðtalið má sjá hér að ofan þar sem hann ræðir meðal annars viðskipti og sendir heillaóskir á brúðhjón sem létu pússa sig saman í dag.
Athugasemdir