Mbappe var í byrjunarliði Frakklands og spilaði allan leikinn. Hann fékk það hlutverk að taka fimmtu spyrnu Frakka í vítaspyrnukeppninni gegn Sviss.

Yann Sommer varði spyrnuna og Sviss því áfram í 8-liða úrslitin þar sem liðið mætir Spánverjum.

Mbappe átti undarlegt mót. Hann skoraði ekki mark á mótinu og var í sárum sínum eftir leikinn í kvöld en hann sendi í kjölfarið frá sér yfirlýsingu.

„Það er erfitt að snúa við blaðinu. Sorgin er mikil eftir þessi úrslit og við náðum ekki markmiðum okkar. Mér þykir leitt að hafa klúðrað þessari spyrnu. Ég vildi hjálpa liðinu en það mistókst. Það verður erfitt að sofna í kvöld en þetta eru áhætturnar sem fylgja íþróttinni sem ég elska svo mikið."

„Ég veit að stuðningsmenn Frakklands eru vonsviknir en ég vil samt sem áður þakka ykkur fyrir stuðninginn og fyrir að hafa alltaf haft trú á okkur. Það mikilvægasta er að koma sterkari til baka úr þessu fyrir komandi áskoranir. Ég vil um leið óska Sviss til hamingju og óska þeim góðs gengis á mótinu," sagði í yfirlýsingu Mbappe.