Tufa ásamt Heimi Guðjóns
„Hundfúlir og mikið svekkelsi, gerðum mikið og vildum þetta mikið í dag en hlutirnir eru ekki að falla með okkur þessa dagana, fáum á okkur mark undir lok fyrri hálfleiks beint úr aukaspyrnu og fáum dauðafæri í stöðunni 1-1 og fáum svo á okkur klaufalegt mark í lokin sem skilur á milli," sagði Srdjan Tufegdzic aðstoðarþjálfari Valsara eftir 1-2 tap gegn Stjörnunni á heimavelli.
Lestu um leikinn: Valur 1 - 2 Stjarnan
Seinna mark Stjörnunnar kom úr föstu leikatriði þegar að Hilmar Árni kom með geggjaða aukaspyrnu inn á teig þar sem Björn Berg Bryde skallaði boltann í netið.
„Gríðarlega svekktur með það, við erum að æfa þetta mikið og fórum vel yfir þetta í gær og þetta er akkúrat eins og aðrir hlutir sem eru ekki að falla með okkur þá kemur svona mark sem við erum ekki þekktir fyrir að fá á okkur."
Átti þessa frammistaða Valsara skilið þrjú stig að mati Tufa?
„Það er góð spurning hjá þér, erfitt að segja þegar þú tapar 1-2 en í stöðunni 1-1 fengum við tvö dauðafæri og vorum með öll völd á vellinum en við tökum þetta tap bara á kassann og verðum bara að halda áfram, það þýðir ekkert að grenja yfir þessum leik."
Valsmenn fara á Kópavogsvöll í fyrsta leik eftir landsleikjahlé og mæta Blikum sem er sannkallaður stórleikur.
„Það eru bara allir leikir úrslitaleikir, þessu leikur í kvöld var úrslitaleikur og við sjáum til hvernig Breiðablik - Fylkir fer á morgun en það þýðir ekkert annað en að mæta í Kópavogsvöll með kassann úti og vinna Blikana."
Viðtalið má sjá í heild sinni hér fyrir ofan þar sem Tufa ræðir um sóknarleikinn hjá sínu liði sem og komandi landsleikjahlé.
Athugasemdir
