Logi Ólafsson.
,,Þetta var slakur leikur af okkar hálfu og lélegur endir á góðu móti," sagði Logi Ólafsson þjálfari Stjörnunnar eftir 4-0 tap fyrir FH í Kaplakrika í lokaumferð Pepsi-deildarinnar í dag.
,,Við erum að ná sögulegum árangri í sögu félagsins en mér fannst við ekki vera tilbúnir í að koma og stíga skrefið lengra. Það var eins og þetta skipti engu máli sem það virkilega gerði. Ég er virkilega óánægður með þetta."
Logi var spurður hvort hann hafi séð einhverja ljósa punkta þrátt fyrir þetta stóra tap og svaraði því neitandi.
,,Nei, það var bara bjart í Hafnarfirði og það eru einu ljósu punktarnir sem við sáum því við vorum ekki góðir í dag," sagði Logi en tímabilið heilt yfir var gott, liðið komst í Evrópukeppni og bikarúrslit.
,,Það er eins og með ástina að það er gott að vera fljótur að gleyma ef eitthvað gerist í einkalífinu. Við ætlum að hafa það þannig í kvöld. Að vera fljótir að gleyma þessu og reyna að skemmta okkur. Þetta hefur verið frábært keppnistímabil, við höfum verið að spila vel og vorum að heyja fjórða leikinn á móti FH og unnið hina þrjá."
,,Það er margt sögulegt sem hefur gerst í leikjum okkar, við höfum haldið hreinu sem var ekki daglegt brauð í Garðabænum, unnið KR í fyrsta skipti og margt," sagði Logi sem hrósaði svo Bjarna Jóhannssyni fyrir gott starf með liðið og sagði liðið skemmta sér í kvöld en minnti á að hóflega drukkið vín gleður mannsins hjarta og vonaði að þannig yrði í kvöld."
Athugasemdir
