Kraftmikill seinni hálfleikur Íslands skilaði sigri í Póllandi

Stelpurnar okkar í íslenska kvennalandsliðinu léku í dag sinn eina vináttulandsleik í undirbúningi fyrir EM á Englandi. Leikið var gegn Póllandi ytra.

Heimakonur leiddu verðskuldað í hálfleik en í seinni hálfleik var mun meiri kraftur í íslenska liðinu. Berglind Björg Þorvaldsdóttir jafnaði í 1-1, Gunnhildur Yrsa Jónsdóttir átti stoðsendinguna.

Tveimur mínútum síðar var Ísland komið í forystu þegar Sveindís Jane Jónsdóttir skoraði.

„Þarna sýnir Sveindís af hverju hún er í byrjunarliðinu hjá einu besta liði heims. Veður bara inn á teiginn og smellir boltanum bara í þaknetið. Eins og að drekka vatn fyrir hana," skrifaði Guðmundur Aðalsteinn Ásgeirsson sem er í Póllandi og textalýsti leiknum.

Agla María Albertsdóttir kom svo af bekknum og átti lokaorðið á 84. mínútu. Íslenskur endurkomusigur nú þegar styttist í fyrsta leik á EM. Margt gott í leiknum í dag en ýmislegt sem hægt er að bæta.

„Geggjað mark. Við vinnum boltann hátt á vellinum og Agla María fær boltann. Hún horfir strax á markið og lætur vaða af einhverjum 20 metrum sirka. Boltinn syngur í netinu, glæsilegt mark hjá varamanninum."

Leikir Íslands á EM:
10. júlí gegn Belgíu (Academy Stadium, Manchester)
14. júlí gegn Ítalíu (Academy Stadium, Manchester)
18. júlí gegn Frakklandi (New York Stadium, Rotherham)