„Ég er ánægður með margt og bara vonsvikinn að hafa ekki náð að skora. Þróttur fékk sín færi að sjálfsögðu líka en ég held að það hefði allavega enginn verið hissa ef að við hefðum unnið þennan leik en svona var þetta. Bara hörkuleikur, jafn og spennandi og bara nokkuð gaman af þessu“ sagði Jóhann Kristinn Gunnarsson, þjálfari Þór/KA eftir 0-0 jafntefli gegn Þrótti í Laugardalnum í dag.
Lestu um leikinn: Þróttur R. 0 - 0 Þór/KA
Þór/KA spilaði við Breiðablik í síðustu umferð þar sem þær lentu 6-0 undir í fyrri hálfleik en hvað fannst Jóhanni um þennan leik sem svar við þeirri frammistöðu?
„Já og nei. Þetta eru náttúrulega allt sjálfstæðir leikir. Við fengum skell í 45 mínútur og vitum að það á ekki að skilgreina hvað við erum eða hvernig tímabilið okkar er og þar vorum við bara flengd rækilega að liði sem er að sækjast eftir gulli og var á flugi í 45 mínútur og sennilega ekki spurning hvernig þessi deild endar ef þær ná því upp aftur. Fyrir okkar stelpur þá finnst mér þær gera þetta vel að keyra hérna suður í morgunn, stökkva í gallann, gera sig klárar og berjast fyrir félagið sitt. Það er þreyta og það er langt síðan við byrjuðum mótið og allt þetta, gamla tuggan. En ég ætla bara að segja að ég sé mjög ánægður með mína leikmenn í dag, hvernig þær spiluðu leikinn.“
Síðasti leikur Þór/KA er gegn Víking R. næstu helgi en liðið sem sigrar þann leik endar í 3. sæti deildarinnar. Aðspurður hvort stefnan sé ekki að klára þann leik með sóma segir hann „Fyrst og fremst held ég að það sé bara að við töpuðum fyrir þeim síðast og við þurfum að svara fyrir það. Það sem fylgir í kjöfarið er að við verðum bara áfram í sætinu sem við höfum verið í mjög lengi og svo gerum við upp eftir þann leik hvernig okkur finnst tímabilið.“
Viðtalið við Jóhann má sjá í heild sinni í spilaranum hér að ofan.
