Gunnar Heiðar Þorvaldsson þjálfari Njarðvíkur

Mynd: Fótbolti.net - Eyjólfur Garðarsson

„Hrikalega lélegt. Út úr karakter, menn ekki að gera það sem þeir áttu að gera. Leit út eins og menn vildu ekki spila og vera inni á vellinum. Allt of margir sem voru bara með hauskúpuleik hérna í dag." Sagði svekktur Gunnar Heiðar Þorvaldsson þjálfari Njarðvíkinga eftir tapið í kvöld. 

„Við sýnum karakter að koma tilbaka og koma þessu í 2-2 en svo bara gerist eitthvað. Við erum að ýta og erum að ná þessum færum. Fáum tvö mjög góð færi til þess að skora þetta 3-2 mark en við náum ekki að skora og þeir ná skyndisókn og skora úr því. Þá er bara eins og við missum hausin þó það sé korter eftir eða hvað það er. Þetta verður bara eins og einhver spilaborg sem hrynur."

Gunnar Heiðar vildi meina að alltof margir leikmenn hjá sér hefðu átt hauskúpuleik.

„Ég hefði bara viljað að leikmenn yrðu heiðarlegir við mig hvort að þeir vildu vera inni á vellinum eða ekki. Það voru bara alltof margir sem að voru með hauskúpuleik í þessum leik."

Gunnar Heiðar var virkilega pirraður með heildarbragin á liðinu sínu í dag.

„Já við gerðum bara nákvæmlega ekkert af því sem við áttum að gera. Við erum bara komnir í það að kenna einhverjum öðrum um í staðin fyrir að taka ábyrgð á þessu sjálfir og litum út fyrir að vera bara algjörir ég veit ekki einusinni hvað. Neðri deildar leikmenn sem voru að bíða eftir að komast í eitthvað Domino's pizza tilboð."