Rashford leikmaður mánaðarins - „Verður að fara með á HM"

Marcus Rashford, sóknarmaður Manchester United, hefur verið valinn leikmaður mánaðarins í ensku úrvalsdeildinni.

Þetta er í fyrsta sinn síðan í janúar 2019 sem Rashford vinnur þessi verðlaun. Hann hefur átt frábæran septembermánuð; skapaði sigurmark Jadon Sancho gegn Leicester, skoraði svo tvö mörk og bjó til annað gegn Arsenal þann 4. september.

Rashford hefur fundið sjálfstraustið að nýju. „Elítuleikmaður, kominn aftur á skrið, svo mikilvægur fyrir Manchester United, verður að fara með á HM," skrifaði íþróttafréttamaðurinn virti Henry Winter á Twitter.

Ekki er víst hvort Rashford geti spilað með United í grannaslagnum gegn Manchester City á sunnudag þar sem hann er að glíma við meiðsli.