Guðmundur Steinn er fyrirliði liðsins.
Edin Beslija er gríðarlega öflugur.
Einar Hjörleifsson markvörður er mikill vítabani.
Fótbolti.net kynnir liðin sem leika í 1. deild í sumar eitt af öðru eftir því hvar þeim er spáð. Við fengum alla fyrirliða og þjálfara í deildinni til að spá fyrir sumarið og fengu liðin því stig frá 1-11 eftir því en ekki var hægt að spá fyrir sínu eigin liði.
Spáin:
1. ?
2. ?
3. ?
4. ?
5. Víkingur Ó. 170 stig
6. KA 144 stig
7. Fjölnir 135 stig
8. Þróttur 110 stig
9. BÍ/Bolungarvík 78 stig
10. ÍR 58 stig
11. Höttur 43 stig
12. Tindastóll 38 stig
5. Víkingur Ó.
Heimasíða: vikingurol.bloggar.is
Lokastaða í fyrra: 4. sæti í 1. deild
Víkingur Ólafsvík hefur náð mörgum mjög athyglisverðum úrslitum á undirbúningstímabilinu og ljóst að ekkert lið á landinu getur bókað sigur gegn þessu vel skipulagða liði. Ólafsvíkurliðið hefur gríðarlega sterkt byrjunarlið og telur álitsgjafi okkar að það muni enda ofar en spáin segir.
Styrkleikar: Það hefur ekki verið vandamál hjá Ólafsvíkíkingum undanfarin ár að verjast en ég tel þó að styrkleiki þeirra liggi í þeim vopnum sem þeir hafa fram á við. Þar hafa þeir Guðmund Stein, Guðmund Magnússon og nú Arnar Svein Geirsson.
Veikleikar: Víkingar eru með mjög gott byrjunarlið en breiddin er ekki mjög mikil. Þeir loka aldrei augunum og eitthvað segir mér að það eigi enn eftir að bætast við leikmenn. Ef það gerist er spurning hversu fljótt þeir ná að aðlagast.
Lykilmenn: Einar Hjörleifsson, Edin Beslija og Guðmundur Steinn Hafsteinsson.
Gaman að fylgjast með: Það verður mjög spennandi að sjá hvernig Arnar Sveinn Geirsson stendur sig í sumar í nýju umhverfi. Hann gaf það út í vetur að hann væri kominn í frí frá fótbolta þar sem hann fékk einhvern leiða og fór að æfa handbolta.
Þjálfarinn: Ejub Purisevic hefur margsannað sig í Ólafsvík. Oft á tíðum hefur hann náð frábærum árangri með ekkert mjög góðan mannskap. Í dag er hann þó kominn með þrusulið í hendurnar, lið sem á að geta farið upp um deild. Ég býst jafnvel við að þeir geri það í sumar.
Líklegt byrjunarlið í upphafi móts:
Komnir:
Björn Pálsson frá Stjörnunni á láni
Torfi Karl Ólafsson frá KR á láni
Arnar Sveinn Geirsson frá Val
Farnir:
Hilmar Þór Hilmarsson í Stjörnuna (Var á láni)
Kristján Óli Sigurðsson í Augnablik
Nicholas Anthony Efstathiou til Suður Afríku
Matarr Nesta Jobe í Val (Var á láni)
Þorsteinn Már Ragnarsson í KR
Fyrstu leikir Víkings Ó. 2012:
12. maí: Víkingur Ó. - Fjölnir
19. maí: Tindastóll - Víkingur Ó.
26. maí: Víkingur Ó. - Höttur
Athugasemdir
