Gylfi Þór Sigurðsson, leikmaður Tottenham, er ánægður með liðsstyrkinn sem félagið krækti í undir lok félagaskiptagluggans. Tottenham fékk markvörðinn Hugo Lloris í sínar raðir í síðustu viku sem og Moussa Dembele og Clint Dempsey.
,,Við bættum nokkrum við og það er frábært," sagði Gylfi Þór við fjölmiðla á æfingu íslenska landsliðsins í dag.
,,Við erum með frábæran hóp og það var gott að fá þennan markmann til viðbótar og síðan Dembele og Dempsey sem eru topp úrvalsdeildarleikmenn. Það eru spennandi tímar framundan og vonandi aðlagast þeir hlutunum sem fyrst til að við getum farið að vinna einhverja leiki."
Gylfi segist ekki vera smeykur við aukna samkeppni um sæti í byrjunarliðinu hjá Tottenham.
,,Ég vissi það alveg þegar ég fór til Tottenham að það yrðu keyptir leikmenn og einhverjir myndu fara. Við viljum hafa allavega tvo leikmenn í hverri stöðu, það er það mikið af leikjum. Við erum í Evrópudeildinni og í nokkrum keppnum á Englandi. Það er jákvætt að það séu góðir leikmenn að koma."
Tottenham er með tvö stig eftir þrjár umferðir í ensku úrvalsdeildinni en Gylfi hefði sjálfur viljað komast á blað í þessum leikjum.
,,Ég hefði auðvitað viljað skora í fyrstu leikjunum en svona er þetta. Þetta kemur í hrunum, stundum skorar maður og stundum ekki. Við hefðum átt að vinna þessa tvo heimaleiki sérstaklega en svona er þetta. Við verðum að halda áfram, hafa trú á þjálfaranum og okkur sjálfum og þá kemur þetta," sagði Gylfi.
Hér að ofan má sjá viðtalið í heild sinni.
