Fylkir 2 - 0 ÍBV (17 í dag)
Það styttist væntanlega í fyrsta mark eyjamanna í deildinni í ár, enda liðið farið að krækja í framherja. Held þó að Fylkir haldi hreinu í Lautinni og vinni 2-0 sigur. Sá ÍBV gegn Fjölni í 1. umferð og þar átti ÍBV varla færi. Sumarið gæti orðið erfitt fyrir eyjamenn, en held samt að þetta fari allt að koma hjá þeim eftir þennan Fylkisleik.

Stjarnan 1 - 0 Leiknir (19:15 í kvöld)
Stjarnan mun gera það sem þarf til að taka þrjú stig í fyrsta heimaleik tímabilsins. Leiknismenn verða vel skipulagðir og gefa Íslandsmeisturunum ekki tommu eftir, en meistarnir gera nóg til að vinna og ég gæti trúað því að Stjarnan vinni nýliðana með minnsta mun.

ÍA 2 - 2 Víkingur (19:15 í kvöld)
Óli Þórðar sækir jafntefli í heimabæ sinn á Skipaskaga. Var að spá í að setja 1-1 jafntefli á þennan leik, en set 2-2. Held að það væru bara fín úrslit líka fyrir Skagamenn, sem vilja þó eðlilega vinna heimaleikina sína.

KR 3 - 2 Fjölnir (19:15 í kvöld)
Nú vinna KR-ingar fyrsta leikinn. En Fjölnismenn eru sprækir og hafa litið vel út í fyrstu tveimur leikjum deildarinnar. Fjölnir mun því gefa KR hörkuleik og ég gæti alveg trúað því að Fjölnir yrði yfir í leiknum á einhverjum tímapunkti. Var jafnvel að spá í að setja jafntefli á þennan leik, en held samt að KR taki fyrsta sigurinn í ár á heimavelli og hann komi núna.

Valur 0 - 3 FH (19:15 í kvöld)
Valsmenn hafa fínt lið og hafa spilað einn góðan hálfleik það sem af er leiktíð. FH hefur einhvern veginn bara gert það sem hefur þurft til að vinna sína leiki og maður hefur haft það á tilfinningunni að þeir gætu unnið leikina með meiri mun ef þeir kærðu sig um. Held þeir muni ekki eiga í nokkrum vandræðum með Valsmenn.

Keflavík 3 - 4 Breiðablik (20 í kvöld á Stöð 2 Sport)
Er ekki alltaf stuð í leikjum milli þessarra liða? Langaði að henda enn einu jafnteflinu á Blikana, en ákvað að setja sigur á þá. Keflavík gæti svosem líka alveg unnið leikinn. Var ekki alveg viss hverju ég ætlaði að spá um þennan leik, en lokaði bara augunum að lokum og benti í átt að Kópavogi. Hlýtur að vera markaleikur samt.

Fyrri spámenn:
Jóhann Ólafur Sigurðsson (3 réttir)
Egill Ploder Ottósson (2 réttir)

Góðan og gleðilegan leikdag! Heil umferð í Pepsi-deildinni og við hvetjum ykkur til að vera með okkur gegnum #fotboltinet kassamerkið!

— Leikdagur! (@Fotboltinet) May 17, 2015