„Maður á að vera þarna til að skora og þetta er besti leikur minn í sumar," sagði Elfar Árni Aðalsteinsson, framherji KA, við Fótbolta.net í dag.

Elfar Árni er leikmaður 17. umferðar í Pepsi-deildinni en hann skoraði þrennu og lagði upp eitt mark í 5-0 sigri á Víkingi Ólafsvík í gær.

„Ég vona að ég nái að halda þessu áfram. Það er verst að maður dettur beint í frí núna," sagði Elfar en landsleikjahlé er framundan.

KA lagði Víking R. 1-0 í síðustu viku en sigurinn í gær var mun öruggari.

„Þetta var töluvert þægilegra. Eftir sigurinn á móti Víkingi kom meiri ró yfir mannskapinn. Við vorum aðeins rólegri þegar við fórum inn í þennan leik. Það létti stressinu að ná marki snemma og við gátum spilað fótbolta sem við viljum spila."

KA er núna í 5. sætinu með 24 stig, stigi frá FH sem er í 3. sæti. FH á tvo leiki til góða en efstu þrjú sætin gefa Evrópusæti. Á KA séns á Evrópubaráttu?

„Það er séns. Við getum gefið öllum liðum í þessari deild leik. Ef við höldum áfram að vinna þá er það möguleiki. Það er stutt niður og stutt upp. Vonandi höldum við áfram að fara upp á við til að hafa að einhverju skemmtilegu að keppa í lokaleikjunum."

Árið 2013 fékk Elfar Árni þungt höfuðhögg í leik með Breiðabliki gegn KR. Leiknum var hætt í kjölfarið en Elfar var fljótur að ná sér.

„Ég hef aldrei fundið neitt sem ég tengi við höfuðhöggið. Ég er hvergi banginn eftir það," sagði Elfar.

Elfar hefur frá æsku verið harður stuðningsmaður Newcastle. Helgin var góð hjá honum því auk sigurs KA í gær þá náði Newcastle að vinna sinn fyrsta leik á tímabilinu þegar liðið rúllaði yfir West Ham á laugardag.