Union Berlin og Wolfsburg mættust í fyrsta leik dagsins í þýska boltanum og leiddu heimamenn í Berlín í hálfleik.

Sebastian Andersson skoraði eina markið í fyrri hálfleik með skalla eftir aukaspyrnu eftir markmannsmistök.

Marvin Friedrich tvöfaldaði forystuna með öðrum skalla eftir aukaspyrnu í síðari hálfleik en Yannick Gerhardt minnkaði muninn skömmu síðar. Þriðja skallamark leiksins, í þetta sinn eftir hornspyrnu.

Það var á lokakaflanum sem Wout Weghorst jafnaði fyrir Wolfsburg og reyndist það lokamark leiksins. Lokatölur 2-2.

Wolfsburg er einu stigi frá Evrópusæti eftir jafnteflið. Union Berlin kemur fimm stigum þar á eftir.

Stöðva þurfti leikinn í fyrri hálfleik vegna óláta stuðningsmanna sem voru með borða og sungu níðsöngva í garð Dietmar Hopp, eiganda Hoffenheim.